DSC04554

Талаптың мініп тұлпарын….

Бой салыстыратын заман емес, ой салыстыратын заман.

Н.Ә.Назарбаев

1 наурыз күні Халықаралық Бизнес Университетінде Рухани Жаңғыру – ұрпақтар сабақтастығы  мемлекеттік бағдарламасы шеңберінде Тіл Орталығы қазақ тілі оқытушыларының әдістемелік орталығы күшімен салтанатты кездесу  ұйымдастырылды. Кездесуге белгілі мәдени және ғылым қайраткерлері: М.Әуезов атындағы драма театрының актері, киноактер, Қазақстанның еңбек сіңірген қайраткері, «Құрмет» орденінің иегері, Болат Әбділманов; Ғ.Мүсірепов атындағы Қазақ мемлекеттік академиялық балалар мен жасөспірімдер театрының актері, «Дарын» мемлекеттік сыйлығының иегері, тележурналист, тележүргізуші  Рахман Омар; ақын,  мемлекеттік «Серпер» жастар сыйлығының иегері, «Қазақстанның 100 жаңа есімі» жобасының жеңімпазы Ержан Жұмабек; ғалым, аудармашы, полиглот, «Қазақстанның 100 жаңа есімі» жобасының жеңімпазы Қуаныш Жұмабек шақырылды.

Университет әкімшілігі тарапынан кездесуге ХБУ президенті Ахмед-Заки Д.Ж., оқу-әдістемелік жұмыс жөніндегі проректор Махметова А. М., базалық жоғары білім факультеті                                                                                                                                                                                                                                                                                                                                                                                                                                                                              DSC04556                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                             деканы Дүзбаева Р.М. қатысты.

Кездесу сұқбатын бастаған Болат Әбділманов еліміздің қазіргі әлеуметтік өміріндегі  көптеген өзекті мәселелерге  тоқталды.  Болашақтан  күдер үзуге, қоғамдық деңгейде сары уайымға салынуға тосқауыл болатын – өнер күші, – деп пайымдады актер.  Оның пікірінше, жастардың өзін-өзі өлімге қиюы, өмірден түңілуі – жылауық поэзия, қайғылы фильм, қасіретке толы хабар тыңдаудың салдары, сол себепті жастарды жарқын келешекке шақыратын  жайдары кейіпкерлер, публицистикалық және көркем  бірегей туындылар көптеп шығарылуы тиіс. Театр қайраткері өз өмірбаянынан қызықты деректер келтіріп, студенттердің қойған сұрақтарына жауап берді.

Одан кейін сөз алған Рахман Омар қазіргі телевидениенің қазақ тілді сегментінің  күй-жайына қысқаша шолу жасады. Рейтинг  қуалау  қоғамдық сананы азғыратын  сапасыз телетуындылардың ротациясын арттырып, ұлттық  мүддені  көздейтін шығармаларды  көрермен назарынан сырт  қалдыратынын  атап өтті.  Кездесуге жиналған студент қауымы  «Мың бір мақал» авторына  ұлтжанды  сапалы хабарлардың  әлі де көптеп шығатынына сенім білдіріп, алғысын айтты.  Журналист  жастарға  –  жанын арының садағасы еткендер  ұрпағына –   азаматтық  ұстанымды   әрқашан да  биік ұстауға шақырды.

 

Ақын, айтыскер, көптеген  әдеби және мәдени байқаулардың жүлдегері  Ержан Жұмабек  кездесуге ерекше шығармашылық шырай берді.  Лирикалық тұнық өлеңдерін оқып, студенттердің орындауындағы  өз поэзиясынан  үзінділер  тыңдап,  тіл тазалығы – дің тазалығы екенін  өз тәжірибесінен, ұлылар өмірінен  алынған  деректермен  негіздеп  атап өтті.

Ғалым Қуаныш Жұмабек  сөзін «Тіл – адамның адамдық белгісінің зоры, жұмсайтын қаруының бірі» деген Ахмет Байтұрсынұлының тағлымымен бастап, қазіргі цифрлік технологиялар қарқынды дамыған заманда тіл мықты идеологиялық қаруға айналғанын айтты. Әр азаматтың  өз елінің  мемлекеттік тілін білуі оның Отан алдындағы парызы.  Ұлттық тілді ұлықтау қаншалықты маңызды болса, халықаралық деңгейде өз қажеттілігін растаған ағылшын тілін үйрену соншалықты тиімді деп пайымдады.   Автор қазақстандықтарға арнап шығарған  ағылшын тілі оқулығының құрылымымен, мазмұнымен қысқаша таныстырып өтті.

Көктемнің бірінші күнінде, Алғыс айту мерекесінде, сәрсенбінің сәтінде өткен жиын қатысушыларға жайлы әсер қалдырды.